As Womansplainers

Señoras explicando cousas desde 2021. O podcast coas señoras que máis forte opinan do Podgalego.

Play

Open in

20 episodes
Avg 1 hr 15 min
Galician

Episodes 20

Newest Oldest Longest

All20 Unplayed20 In progress0 Played0

S6 · E14
July 2 · 1 hr 20 min
Codependencia
Neste episodio, o grupo e maila nosa convidada Marta deconstruímos a trampa da codependencia, unha dinámica disfuncional que vai moito máis alá das relacións de parella. Analizamos como as mulleres somos socializadas para sermos as eternas coidadoras, perpetuando mitos desde Wendy ou a Pequena Serea ata a nova romantización da nai sacrificada. Esta necesidade de compracer e de salvar os demais desprázase tamén ao terreo da amizade (co rol da "nai do grupo"), á familia (baixo a capa da lealdade) e ao traballo (onde o mercado se aproveita de quen non sabe dicir que non). Fronte a isto temos propostas, pero debes escoitalas!
S6 · E13
June 4 · 1 hr 14 min
Moda
No episodio desta semana acompáñanos a Elena, lista, modista, feminista e de Cabral. Falamos do seu proxecto “Teito” e da experiencia de emprender dentro do mundo da moda dende unha perspectiva ética e de compromiso social. Debatimos sobre o nesgo de xénero á hora de consumir moda rápida e seguir tendencias. Ata que punto se aproveita a fast fashion das nosas inseguranzas estéticas para facturar? Por que é un drama repetir modeliño en eventos sociais? Cal é o custo ambiental da moda rápida? É realmente sustentable a moda que nos venden como tal? Está a solución no mercado de prendas de segunda man e na reparación das que xa temos? Acompáñanos neste novo episodio sobre a moda, non perdas detalle e non esquezas deixarnos un comentario coas túa opinións e recomendacións!
S6 · E12
May 14 · 1 hr
Neofalantes
Está xustificado para unha persoa de fóra da Galiza aprender galego? E se deciden facelo, hai recursos para aprender galego? É a chegada de xente foránea, especialmente estranxeira, a responsable da caída no uso do galego? Como é a calidade do galego das persoas neofalantes? De todo isto, e algunha cousa máis, falamos neste programa con Leticia, unha arquitecta e deseñadora gráfica, residente en Zaragoza e orgullosa neofalante.
S6 · E11
April 30 · 1 hr 9 min
Sharenting
Neste episodio das Womansplainers falamos do sharenting: o hábito de publicar nas redes fotos, videos e intimidades das crianzas. Onde está o límite entre compartir lembranzas e converter os fillos en contido dixital? Comentamos bebés con conta propia, familias convertidas en marca, crianzas como accesorio estético e o “pai deconstruído” aplaudido por facer tarefas básicas. Tamén abordamos os riscos reais para a privacidade infantil, os casos xudiciais e as novas leis que buscan protexer a identidade dixital da infancia. Que dereito teñen as crianzas sobre a súa propia imaxe? Un episodio para rir, indignarse e pensar antes de subir esa foto.
April 2 · 1 hr 15 min
Suplementación
No episodio desta semana, para falarmos de suplementación, acompáñanos a María Otero, graduada en nutrición humana e dietética. Segundo a OCU, durante o ano 2025 o 60% da poboación tomou algún tipo de suplemento alimentar, pero existe realmente algún suplemento necesario para o noso organismo que non poidamos obter a través dunha dieta equilibrada de forma sinxela? Falamos sobre suplementación deportiva e do auxe dos produtos “altos en proteína”. Serven de algo ou só son estratexias publicitarias? Que beneficios ten unha dieta rica en proteínas? Coláxeno, niacinamida, produtos adelgazantes… Debatimos sobre como a suplementación alimentar vai ligada á presión estética, formando parte da cultura da obsesión coa eterna xuventude. Por último, falamos da inocuidade percibida en certos suplementos por seren “naturais” e dos perigos do seu uso sen seguimento profesional. E vós, tomades algún tipo de suplemento? Comentádenos as vosas experiencias e non perdades detalle deste novo episodio das Womansplainers!
S6 · E9
March 5 · 1 hr 11 min
Cores
No novo episodio das Womansplainers, Carme, Sara, a Malvada Profe e Ghanito reciben a Faula, investigadora do Morrazo que traballa en Glasgow, para falar sobre as cores desde unha perspectiva científica, lingüística e cultural. O programa parte dunha pregunta provocadora: existen realmente as cores? Explícase que non son propiedades fixas dos obxectos, senón interpretacións cerebrais da luz, como demostran o daltonismo ou a sinestesia. Tamén se aborda como mudou o concepto de cor ao longo da historia, sen esquecer a parte talvez máis curiosa que é como as linguas organizan e nomean as cores de maneira diferente, condicionadas por factores sociais e culturais. Non fiques pálida e dalle ao play!
S6 · E8
February 19 · 1 hr 9 min
Tempo
Estragou a pandemia a nosa percepción do tempo? Houbo un reseteo global? Por que, dende 2020, todo parece ao mesmo tempo onte e hai séculos? Estivo Rihanna embarazada eternamente ou foron varios embarazos consecutivos? Esa sensación de “desintegración temporal” non é só un meme: é unha experiencia compartida. Medir o tempo foi sempre unha necesidade. Primeiro por motivos relixiosos, polas estacións e o traballo no campo; despois, coa modernidade, convertémolo nunha máquina de produtividade. Pero o tempo non é só reloxo: é lingua. Como visualizades vós o tempo: É unha liña recta ou unha árbore con pólas? A nosa maneira de “velo” está ligada ao idioma que falamos. Mudar a lingua é mudar a percepción do tempo. Nalgunhas casas, os ovos cocíanse “o que duran dous nosopais e un avemaría”. A lingua moldea o espazo… e tamén o futuro. Hai linguas sen futuro gramatical. Hai quen chega tarde ao seu propio enterro. Falamos de TDAH e cegueira temporal, de quen non le reloxos analóxicos. Porque o tempo, cando es nena, é infinito; e logo escápache entre os dedos. E todo depende do que esteas a facer. Escoita o episodio. E intenta non mirar para o reloxo.
S6 · E7
January 29 · 1 hr 22 min
Vandalismo e acción directa
No episodio desta semana, para falarmos de vandalismo, acompáñanos a Oriana, socióloga e axente de igualdade en Ferrolterra. Comezamos definindo que é o vandalismo e delimitando a orixe histórica do termo. En que se diferencia da acción directa e que motivacións pode haber detrás destes actos? Debatimos sobre o emprego da acción directa ao longo da historia como método de protesta social, sobre como xorden estes movementos e cal é o seu papel a nivel político. Queima de contedores, rotura de escaparates, vandalización de obras artísticas… Mais dentro dos propios movementos sociais, que opinión se ten na actualidade no referente ao emprego da acción directa como método de protesta? Por último, non podíamos rematar o episodio sen abrir o eterno melón do graffiti e a arte urbana. Expresión artística, acto vandálico ou cuestión de clase?
S6 · E6
January 15 · 1 hr 11 min
Vergoña
Neste episodio das Womansplainers reflexionamos sobre a vergoña: de onde vén, se nace connosco ou se a aprendemos socialmente, e até que punto é posible desaprendela. Analizamos tamén a relación entre vergoña, corpo e silencio, así como aquilo que deixamos de facer ou dicir por medo ao xuízo alleo. Falamos de quen sente máis vergoña segundo xénero, clase ou idade, da vergoña financeira e do seu impacto, e da súa relación co bullying e o illamento nas aulas. Para abordar estas cuestións contamos coa colaboración de Jeni Herbón, mediadora e psicóloga, que achega unha ollada profesional sobre os conflitos, convivencia escolar e os efectos da vergoña no noso día a día.
S6 · E5
Dec 18, 2025 · 1 hr 26 min
Charramangueiras
O Nadal é unha boa época para espertar o noso espírito máis charramangueiro e as Womansplainers convocamos un akelarre para facermos de árbitras do mal gusto e definir os límites das charramangadas. Hai modas e gustos que veñen e van, coma as ombreiras enormes ou os estampados de leopardo, e constantes que fican, como a aversión á ostentación e os novos ricos como corporización do feo e o rechamante. Non se pode falar de bo e mal gusto sen diseccionar os elementos de clase e xeracionais que determinan as filias e fobias estéticas no noso momento histórico. Neste programa imos de excursión por horrores tan variados como as gender reveal parties, os fachalecos ou as viaxes en cruceiro, sen esquecer facerlle unha visita á nova raíña mundial da charramangada: Donald Trump.
S6 · E4
Nov 20, 2025 · 1 hr 8 min
Xubiladas
Ás Womansplainers xa nos tarda chegar á idade do xúbilo, mais mentres agardamos matamos o tempo gravando podcasts. Por iso, esta semana convidamos a Pepa Barreiro, actriz de teatro xubilada (pero non moito) para falar dos desafíos desta nova etapa. Debatimos con ela a necesidade de xubilarse e como vai mudar as percepción desta etapa agora que as baby-boomers chegarán a ela en masa. Tamén problematizamos as consecuencias económicas e as persoais que ten unha parada de actividade súpeta para moitas xubiladas e como o traballo se relaciona tamén cunha perda de estatus e relevancia social. Naturalmente, non esquecemos falar das que nunca poden xubilarse: as que coidan de fillos, netas, maridos e non cobran por facelo. Escoita este episodio mentres consultas ti tamén cantos días che quedan para a xubilación!
S6 · E3
Nov 6, 2025 · 1 hr 14 min
Bullying
No episodio desta semana acompáñanos Carmen, orientadora escolar, para falarmos dun tema con estatísticas alarmantes: o bullying. Co uso das redes sociais e o auxe das IA cambiaron as formas de agresión? Cales son os sinais de alerta de que alguén está sufrindo ou exercendo bullying? Conversamos sobre os protocolos de actuación nos centros escolares, cales son os procedementos e como se activan. Que limitacións teñen as profesionais á hora de actuar? Por último, debatimos sobre as repercusións do bullying sobre a saúde mental e como traballar en prol do cambio e da creación de espazos seguros. Non perdas este novo episodio das Womansplainers e coméntanos a túa opinión. Agardámoste!
S6 · E2
Oct 23, 2025 · 1 hr 22 min
Diñeiro
Neste episodio das Womansplainers falamos de cartos: do valor económico, social e emocional do diñeiro, e de como este condiciona o noso benestar, as relacións e mesmo o noso concepto de éxito. Preguntámonos por que segue a ser tabú falar de salarios, aforro ou economía doméstica, especialmente entre mulleres, e analizamos o impacto da fenda salarial, a desvalorización das profesións feminizadas e a educación que ensina ás rapazas que “os cartos non importan”. Falamos tamén de criptomoedas e do vínculo entre empoderamento e autonomía económica. Hai feminismo sen educación financeira? A resposta é non. Únete e pensa connosco como sería unha economía deseñada por e para mulleres.
S6 · E1
Oct 9, 2025 · 1 hr 33 min
Nostalxia
Tocounos vivir unha época en que breves sacudidas do sistema, como o apagón de 2025 ou o grande confinamento de 2020, alimentan en amplos sectores da poboación saudades de tempos “máis sinxelos”. Desde a EXB ao Xabarín Club, de Cóntame como foi a A vida portuguesa, a nosa cultura está chea de ficcións, marcas, movementos sociais e partidos políticos dispostos a tirar proveito da NOSTALXIA. Acompañadas de novo por Alva Pico, as Womansplainers debullamos este fenómeno e tentamos pescudar de que teñen en realidade saudades as saudosas do pasado, en que medida a chamada “morriña” é integral á nosa identidade nacional e falamos da nosa propia nostalxia e dos textos en cancións que a espertan. Volvemos, unha tempada máis, prontas para matar a vosa saudade de nós e a nosa saudade de opinar forte!
S5 · E11
May 8, 2025 · 57 min
Mudanzas
No episodio desta semana, para falarmos de mudanzas, non podíamos convidar a outra que non fose a Uxía Castro: xornalista, feminista e trotamundos empedernida cun total de 18 mudanzas ás costas! Como podemos organizar unha mudanza sen que sexa un pesadelo? Á hora de decidir que deixar e que levar, quizáis sexa o momento ideal para doar ou vender cousas que xa non precisamos. Unha vez empaquetadas as nosas pertenzas, como as transportamos para o novo fogar? E subindo o nivel de dificultade: como se xestiona isto en viaxes intercontinentais? Falamos tamén das cuestións emocionais das mudanzas e dos "obxectos fixos dunha vida móbil". Que emocións espertan en nós as mudanzas? Como podemos adaptarnos mellor a un novo fogar? Todas estas cuestións e máis neste novo episodio dasWomansplainers. Agardámoste!
S5 · E10
Apr 24, 2025 · 1 hr 17 min
Reggaeton
Neste episodio adentrámonos nun xénero musical ben polémico: o reggaeton. Debatemos coa artista Pauliña sobre se este estilo é realmente mais machistda do que outras expresións musicais populares. Cuestionamos os prexuízos raciais e de clase, que moitas veces se disfrazan de crítica feminista. Falamos tamén da hexemonía global deste ritmo e da ascensión de artistas que o adoptaron ou que o imitan para se manteren no foco. Ao final o reggaeton é o novo samba, tango ou funk e talvez debamos telo máis en conta.
S5 · E9
Apr 3, 2025 · 1 hr 26 min
Trinta
A nosa ouvinte Antía propúxonos falar sobre a trintena porque, lonxe de tópicos e lugares comúns, ela pensa que a entrada nesta década si que significa cambios e reflexións importantes. Fiando o tema arredor dalgúns deses marcos que na literatura anglosaxona chaman “os fitos da adultez” o episodio servíunos para reflexionar sobre cuestións de natureza moi diversa: traballo, parella, vivenda,... e tamén para comparar as vivencias persoais e xeracionais sobre o paso do tempo e os cambios de etapa dependendo da idade de cada unha de nós.
S5 · E8
Feb 27, 2025 · 1 hr 14 min
Artes marciais
No episodio desta semana acompáñanos a Andrea Otero, psicóloga e taekwondista, para falarmos de artes marciais. Aprendemos que son as artes marciais e en que se diferencian de calquera pelexa da rúa. Segue a ser o terreo das artes marciais un ámbito especialmente masculinizado? Como adoitan aliñarse politicamente estes espazos? É necesaria unha división por xéneros nestas disciplinas? Por suposto, aproveitando a profesión da Andrea, tamén falamos dos beneficios que teñen as artes marciais para a saúde mental e, especialmente, para as persoas neurodiverxentes. Hai unha idade para comezar ou nunca é tarde? É caro? É realista a representación que vemos no audiovisual das escenas de combate? Resolvemos todas estas cuestións e moitas máis no episodio desta semana. Agardámoste preparadas e en garda!
S5 · E7
Feb 13, 2025 · 1 hr 13 min
Asociacionismo
Neste capítulo falamos con Marinha Area de asociacionismo e movementos sociais na Galiza, levantando cuestións sobre o papel das asociacións e preguntándonos se ás veces son unha resposta á ineficiencia do Estado ou o reflexo dunha sociedade civil participativa. Abordamos a dependencia do financiamento público e o risco de instrumentalización política, que pode transformar en ocasións as asociacións en apéndices de partidos. A participación é tamén un punto central, falamos da súa efectividade, especialmente online, e tamén da renovación xeracional. Están as persoas máis novas desinteresadas e desmobilizadas? E ti? estás disposta a involucrarte neste programa?
S5 · E6
Jan 30, 2025 · 1 hr 20 min
USA
Co mundo adaptándose aínda á segunda chegada de Donald Trump á Casa Branca, as Womansplainers botamos man para falar dos EUA dunha convidada chegada de alén mar: Krisha Kinnersley, de 39 anos, procedente de Michigan e coa perspectiva que da ser de alí mais vivir aquí hai anos. Con ela exploramos os lugares comúns sobre os Estados Unidos, e canto hai de certo nas cousas que cremos saber sobre ese país grazas á súa industria audiovisual. Tamén o que eles pensan sobre o resto do mundo e as semellanzas e os contrastes entre o seu país e o noso. Metímonos co elefante na habitación, ou na Casa Branca, e falamos do fato de perdedores convertidos agora en oligarcas reaccionarios, do seu sistema sanitario, de comercio internacional e política migratoria. Como o farán para que acabe quedando mellor o Papa! Naturalmente deixamos coma sempre tempo para dar as nosas dicas, menos estadounidenses do que podería agardarse. Adéntrate connosco nos Estados Unidos, unha terra de oportunidades… para quen poida pagar o prezo.

Showing 1–20 of 20 episodes