![Artwork for 灣區判官[粤语]](https://fdfs.xmcdn.com/storages/54ee-audiofreehighqps/80/35/GKwRIW4OtxhnAAPm1ATwvnzd.jpeg)
transcript
show notes
以前讀書嗰陣,總會見到班同學仔出街裝備齊全,似足去執行任務。而家諗返,其實幾好笑。
通訊方面,嗰時個個都用智能手機,但佢哋褲袋硬係會多一部舊款Nokia。唔係懷舊,係貪佢跌唔爛、唔會卡、待機一個禮拜,有咩事吹雞最可靠。
腰間,一定掛住一抽鎖匙。你以為用嚟開門?係以備不時之需,拳頭揸住匙齒,就係一個迷你指虎,合法自衛工具。
褲頭,攝住包煙,用件衫遮住。但個煙角好尖,行路坐低都會�住條腰。為咗唔俾訓導主任發現,每一步都係同自己肚腩嘅微型搏鬥。
仲有心口個名牌皮袋,條帶索到呼吸都有啲困難,因為打交嗰陣個袋唔可以揈嚟揈去。
腳上嘅窄腳褲,緊到塞唔落隻腳,坐低都要企返起身先得。個斜陰一定要遮住一隻眼,耳針放學換耳環,搞到發炎都要繼續。
最難忘嘅,係嗰啲「子彈仔」單車。車架短到似粒子彈,車尾裝住一對巨型喇叭,叫「車機」。一路踩一路大聲播謝霆鋒嘅《活著Viva》,真係未見其車,先聞其聲。由以前用CD機同水電池,到後來插手機就播得,嗰對喇叭,其實係用嚟話俾全世界知「我喺度」。
你以為佢哋準備緊一場大戰,其實最後嘅用途,可能只係喺便利店買包煙,然後喺街角吹水。你以前有冇試過咁樣出街?
錄音製作| 灣區判官
聲音編輯| 判官女郎
聯絡方式| gba.hunter167@gmail.com
� 你以前有冇咁樣“裝備”過自己?評論區傾吓
