【阿郎台語廣播劇】EP. 03 我要去南島打壞人了！｜EP. 03 我beh來去南島phah歹人！｜白話字(pe̍h-ōe-jī)字幕

〈阿郎〉是一個從鄉下地方展開的冒險故事。住在農村的阿公阿婆，十幾年來一直過著平平靜靜的日子。沒想到，有一天阿婆在小溪邊洗衣服的時候，竟然遇到了一件非常怪異的事情，從那時起，阿公阿婆的生活便產生了巨大的改變。到底發生了什麼樣的事情呢？這就要請大家親身來了解了！


訂閱做工á人Youtube頻道：https://www.youtube.com/@chokangalang
完整ê漢羅／POJ對照文稿khǹg ti官方網站：https://cho-kang-a-lang.github.io/


【漢羅版】

時間teh過chiâⁿ緊，目一nih，A郎已經tō͘-chè，m̄-koh，kah一般ê gín-á khah bô sio-siāng--ê是，A郎leh大真緊，chiah tō͘-chè niâ，已經像3歲gín-á hiah大漢。A公--a憢疑hit粒桃á是仙桃，自hit kang食hit粒桃á了後，精氣神飽tīⁿ，腳手mā ke真liú-lia̍h，a婆--ā風濕痠痛tài 10 gōa冬，mā自食tio̍h桃á了to̍h m̄-bat聽伊ai--過。人講「七坐、八爬、九月發狗牙」，咱A郎4個月teh收nōa ê時，to̍h已經會曉走，lóng無照俗語teh行，凡勢lóng是hit粒桃á ê應效。

A郎kah所有ê 3歲gín-á lóng kāng款，真hoa̍t-phoat，ta̍k kang tī厝--ni̍h四界chông，老公婆看伊kho̍k-kho̍k chông驚伊tio̍h傷，beh jiok是tiāⁿ leh jiok bē-hù。A郎kài khiáu，學siáⁿ lóng教--1-2-遍-á to̍h ē。A公--a想講che gín-á hiah khiáu，kui kang tī厝phut-phut跳mā m̄是頭路，不如ka送去Chín--sàng hia學寫字，bat字總--是無敗害。

庄--ni̍h無幾戶人家，自然mā無學堂，m̄-koh Chín--sàng是學堂先生退休，nā有gín-á beh bat字，lóng ē去拜託伊教。Chit kang早頓食飽，a公--a kā A郎chhōa--leh，to̍h ùi Chín--sàng hia去。路--ni̍h kā A郎講：「等--leh chhōa你去先生hia學寫字，你to̍h ài乖，ài聽先生ê話--ō͘。」A郎聽tio̍h ē-tàng學新ê物件，歡喜kah，嘴笑目笑應好。無jōa久to̍h到Chín--sàng hia，a公--a kā tāi-chì講hō͘ Chín--sàng知，2 ê人講定會好勢，to̍h kā A郎留tī Chín--sàng in tau，ka-tī去做田--ni̍h ê khang-khòe。Án-ne ta̍k kang無歇，一直到第4 kang，teh食早頓ê時，a公kā A郎問講：「學了siáⁿ款？有趣味--無？」A郎soah應講：「He白話字chok簡單，ē-hiáu講to̍h ē-hiáu寫，我已經lóng ē-hiáu--ah，今á日我想beh去別位chhit-thô！」A公驚1 tiô，心內想講「Nah ē hiah緊to̍h khì ho͘ khăn-jió͘--去！」Koh想「既然to bat字--ā，Chín--sàng hia有kài chē冊，無ka chhōa去hia讀冊mā bē-bái，hō͘ A郎--ā加減á bat kóa道理。」To̍h kā A郎講：「Án-ne咱今á日mài學寫字，咱去先生hia看冊，看冊chok心適，冊內底有chok chē好sńg ê故事neh！」A郎聽tio̍h心適好sńg，kāng款歡頭喜面應好。2 ê人食飽照常ùi Chín--sàng hia去。自án-ne，去讀冊變做A郎ta̍k日固定ê tāi-chì。

A郎4歲hit年，厝--ni̍h來1 ê cha-po͘人，是a公--a ê朋友，kah人têng-tâⁿ sio-phah受重傷，知影a公--a bat kóa草藥á，ē-hiáu治傷，專工來chhōe。伊人真細jī，本底藥á the̍h--leh to̍h beh走，a公--a ka講：「你傷kah hiah nī重，beh án-chóaⁿ走？咱che siáⁿ-mih交情--ā，ke 1 hù碗箸niâ，傷治好chiah走--lah！」Kā伊留，後--來伊tī厝--ni̍h tòa beh kui kò月。Hō做進--à。

Chit ê進--à tú來ê時，ài食飯食藥á chiah ē看--tio̍h，其他ê時間lóng tī人客房倒leh歇睏，差不多經過2禮拜了後，人chiah khah有元氣，有時ē去門口埕練刀。講是練刀，mā是gia̍h柴枝teh比1 ê勢niâ，無真正tāng氣力，講是加減á tín動人ē khah緊好。A郎看tio̍h心適，mā gia̍h柴枝tī進--à邊--a tòe leh比。進--à看A郎古錐，to̍h hō͘伊tòe tī邊--a teh學。Án-ne幾kang了後，凡勢是進--à看A郎舞kah範勢bē-bái，soah開始ē kā伊加減á點tuh。

Koh過差不多2禮拜，進--à人好kah完全，the̍h 1 ki木刀，kā A郎叫去門口埕。「郎--ā，你斟酌看，che是我ê刀，刀ài án-ne舞。」Sòa--落-來進--à ta̍uh-ta̍uh-á kā伊ê刀法演1遍hō͘ A郎看。舞soah，koh講：「咱2 ê有緣，我ê刀法你ē-tàng記jōa chē算jōa chē，chit ki木刀是我chit幾日á siah--ê，留hō͘你做紀念，刀ài ta̍k日練，時間長短無要緊，練久你to̍h ē有體會。」Sòa--落-來，kā老公婆kiâⁿ禮seh多謝，人to̍h beh離開。A郎m̄ kam，kā進--à衫á-ki giú--leh m̄ ho͘走。進--à伸手kā A郎頭殼so-so--leh。「郎--ā乖，叔--á有要緊ê tāi-chì ài處理，我nā處理好勢，chiah來chhōe--你。」進--à講soah，人to̍h起行。進--à tú行1-tè-á路，A郎已經目屎流目屎滴，lún bē tiâu，對進--à大聲喝：「叔--á，你一定ài koh來--ō͘！」進--à聽--tio̍h，oa̍t頭對A郎笑--1-ē，無koh講sáⁿ，人to̍h繼續行--去。Hit暝，a婆--ā tah真久，A郎chiah睏--去。

目nih-á koh 1冬，A郎已經5歲，漢草已經kah大人差不多，讀冊練刀以外ê時間to̍h kā老公婆á tàu做kóa khang-khòe。A郎田--ni̍h穡頭項項ē，khioh柴洗衫無問題，有閒釣魚lia̍h水雞，落鼎紅燒做mi̍h配。In 2 ê ang-á-bó͘ mā漸漸á khah清閒，3 ê人歡喜自在好過日。

Tī che iap-thiap ê庄腳所在，nā beh知影別位ê消息，tiāⁿ-tiāⁿ lóng是靠1 kóa四界走chông ê生理人teh流通。有時是喝lin-long--ê，有時是來tia̍h米糧--ê，mā有phah拳頭賣藥á--ê，戲班á，走江湖ê藝人不sám時ē來庄--ni̍h加減á做kóa生理。做生理ê時，嘴mā無leh閒，kā ka-tī四界行踏聽--tio̍h ê消息，chham kóa ka-tī ê意見，講ho͘趣味笑詼a̍h是hàm古hàm古，hō͘人聽tio̍h心適有趣味，siâⁿ人留落來聽，mā khah有機會ke做kóa生理，nā kā in想做庄脚ê新聞放送頭mā真鬥搭。M̄-koh，che新聞lóng有chham 1 kóa in ka-tī ê意見，che hâm俗語teh講--ê，「寄話ē ke」，有lio̍h-á óa意。

Tú好有1日，喝lin-long--ê來到庄--ni̍h做生理。「喝lin-long，賣雜細…，喝lin-long，賣雜細…」。A郎聽tio̍h喝lin-long--ê來，手頭無siáⁿ要緊ê khang-khòe chŏaⁿ pàng--leh，緊走去看。Che喝lin-long--ê車1車生活雜貨kah 1 kóa都市khah時行ê新嫣貨色，來到庄--ni̍h做買賣。買賣ná做ná講古，今á日講tio̍h出港都往南koh去ê hit粒島，來2 ê大歹人，有夠惡質！搶人ê錢，燒人ê厝，人nā beh反抗，to̍h kā人phah kah半小死，叫ta̍k ê to̍h ài做in ê奴才，照時間ài la̍p錢糧，無to̍h koh beh繼續蹧躂，tī hia leh做土霸王。島上ê人ta̍k ê驚in驚kah beh死，敢反抗--ê已經lóng hông phah kah叫m̄敢，人人iau飢失頓，消瘦落肉，有厝無人tòa，有路無人行。

A郎心肝好，tī Chín--sàng hia讀冊mā bat真chē道理，知影人tio̍h互相tàu-saⁿ-kāng，bē-sái無理kâng khia，何hóng是án-ne teh壓迫百姓，che kám有道理，kám有人性？聽tio̍h喝lin-long--ê án-ne講，伊人真受氣，氣kah kui seng-khu teh chùn，氣kah嘴齒kiōng beh kā斷--去，kui ê面á紅kòng-kòng，有khì無tàng tháu，che thiⁿ-kha-ē竟然有hiah拗蠻ê人。趕緊問生理人：「你講--ê kám lóng chiaⁿ實？」應講：「確實是án-ni！」聽tio̍h生理人án-ne講，A郎氣kah peh起來跳，嘴jiáng：「可惡！可惡--ah！」人oa̍t--leh to̍h ùi厝行--去。
--
Hosting provided by SoundOn