Skip to content
Sign in
Artwork for Bündnertalk
Society & CultureLeisureHealth & FitnessMental Health

Bündnertalk

Ramon Heeb

Bündnertalk – Ehrlich, spontan und mit Härz Neui EP jeda zweiti Donnstig, 5i am Morga

Ächti Gspröch ohni Skript. I, dr Ramon Heeb, träffa spannendi Menscha us Graubünda und vo wiiter wäg. Miar reden über ds Läba, Freud, Arbet, verruckti Idea und alles, was grad so passiert, genau so, wia’s im ächta Läba isch: nit perfekt, aber ächt. Immer patschifig und garantiert nia langwilig!

Jedi Episoda startet mit ama kliina Ritual: Zerscht gits an Entweder-oder-Frog an da Gast, dänn törf dr Gast a Frog zrugg an mi stella. Zum Schluss wählt dr Gast a Zahl zwischa 1 und 80 – und mir tauchand spontan in a Frog us minera Lischta i, ganz ohni Vorwarnig.

Los dri und kumm mit uf a Reis dur ehrlichi Gspröch, spontani Moment und guati Vibes.

Mach mit & blib dra: Folg miar uf Instagram @buendnertalk und schick miar dini Idee für mini 80er-Frogalischta, oder säg miar, wän du gera mol ghöra wotsch, oder mäld di selber, wenn du Luscht hesch uf as Gspröch.

Play
Open in
  • 18 episodes
  • fortnightly
  • Avg 29 min
  • German

Episodes 18

NewestOldestLongest
All18Unplayed18In progress0Played0
  • #17
    Yesterday · 35 min

    #17 Wiso schickt ma an Vertrag für 13 Johr nia ab? – Michaela Gander

    Mit 15 isch d Michaela als Uustuuschschüaleri uf Amerika, hät sich Jahr spöter bi dr dütscha Marina als Sanitäteri uf ara Fregatta beworba, alles untrschriba für 13 Jahr Vertrag und da Brief denn nia abgschickt. Statt ufd See isch si uf a Bibelschuel im Bärner Oberland glandet, hät ima Hotel a Uusbildig gmacht und isch ir Schwiz bliba. Miar redand über Kindheitsträum, wo sich alli zwei Wucha ändarand, über Türa, wo zuagangan sind, und über ds Vertraua, dass es scho guat chunnt, au wenn ma grad nit weiss, wia’s witer goht. Es goht um Empathie und drum, wo ma sich abgränza muas, um Gschichta, wo bliba, und um da Underschied zwüscha “ich han an Plan” und “ich läb eifach und luag, wohi’s mi füahrt”. Und du? Isch bi diar mol a Tür zuaganga, wo du eigentlich hätsch offa loh wölla, und hät sich das im Nochhinein als richtig zaigt? Schriib’s miar uf Instagram. Hesch a Idee für mini 80er-Frogalischta, kennsch a spannenda Gascht oder wotsch selber mal ufnäh? Schriib miar uf Instagram: @buendnertalk Meh uf: buendnertalk.ch Wechslisch gad s Handyabo? Do gohts zum Sunrise Agebot

  • #16
    August 27 · 33 min

    #16 Brucht ma Angst? – Annemarie

    D Annemarie isch wieder im Bündnertalk zu Gast. Würsch du liaber nia meh gseh oder nia meh ghöra? D Anne verzellt vo Blindatennis, vo ihram Onkel wo sogar an da WM dabi gsi isch. Kennsch du persönlich a blindi Person? Was würsch du macha, wennd kai Angst hättisch? Miar reden über gsundi und ungsundi Angst, über Phobia (Schlanga sind as klars Thema), über Höhaangst uf ara halbmeterbraita Mura und zwei hundert Meter Tüfi, und über da Unterschid zwüscha Angst und Respäkt. Es goht ums Zuatraua, ums Woga, um Sorga und um Hoffnig, und um a Momänt, wo dr Respäkt gfählt het und drum s Gnick brocha isch. Dia ganz Gschicht mit am Gnick chunnt aber nur, wenn dia EP mindestens hundert Kommentär het. Also: kommentiera, mit dina Fründa teila, denn ghörsch ira wiitera Episoda, was passiert, wema sich masslos überschätzt und dabi s Gnick bricht. Hesch a Idee für mini 80er-Frogalischta, kennsch a spannenda Gascht oder wotsch selber mal ufnäh? Schriib miar uf Instagram: @buendnertalk Meh uf: buendnertalk.ch Wechslisch gad s Handyabo? Do gohts zum Sunrise Agebot

  • #15
    August 13 · 31 min

    #15 Hesch du vier Fründa für alles? – Serena Schlüter

    Rennsch du Marathon oder fahrsch scho Gravelbike? Jeda Tag füf Stunda schlofa oder zäh? Mir rechnand zäma us, wia viel Läbaszit ma verschloft, und chömend uf as Resultat, wo chli weh tuat. Bi dr Frog Nummer 77 wird’s persönlich: Wenn du mit allna Menscha ima Ruum wärsch, wo du jeh kennaglernt häsch, wän würsch suacha? D Serena verzellt vo Fründschafta, wo nöcher sind als di eigani Familia. I reda vo mim erschta Kindheitscrush, vom Wiedergseh noch gfühlta zwanzg Johr und vom Vergää, au bi dena, wo eim gmobbt hend. Denn goht’s um d Frog, ob vier guati Kollega, mit dena ma würkli über alles reda könd, langend. Und ganz am Schluss um da Stadtpark z Chur, warum i sit füf Johr regelmässig döt bi und was es haisst, in Menscha z investiara ohni öppis zrugg z verlanga. Nit nur zwai Wucha, sondern über mehreri Johr. Und du? Hesch du vier Fründa, mit dena du über alles reda chasch? Schrib’s üs doch ind Kommentär. Hesch a Idee für mini 80er-Frogalischta, kennsch a spannenda Gascht oder wotsch selber mal ufnäh? Schriib miar uf Instagram: @buendnertalk Meh uf: buendnertalk.ch Wechslisch gad s Handyabo? Do gohts zum Sunrise Agebot

  • #14
    July 30 · 27 min

    #14 Reda, ohni z verletza – Thaddäus Krause

    I dera Episoda isch wieder dr Thaddl z Gast. Miar redand drüber, wia ma mit Menscha umgoht, wo scho vili abgschriba händ, und warum grad dia as risigs Potenzial händ. Dr Thaddl verzellt, wia er sich sälber i da schwiriga Jugendlicha wiederfindt und warum er jedam immer wieder a nöi Chanca git. Denn wird’s praktisch: gwaltfreii Kommunikation, Ich-Botschafta gega Du-Botschafta und d Frog, warum aim öppis überhaupt so stört. Am Schluss git dr Thaddl sini konkreti Tipps, wia ma sega chan, was aim verletzt, ohni dass ds Gäganüber grad zuamacht. Wia kommuniziarsch du, wenn di öppis verletzt? Schriib üs doch an Kommentar. Hesch a Idee für mini 80er-Frogalischta, kennsch a spannenda Gascht oder wotsch selber mal ufnäh? Schriib miar uf Instagram: @buendnertalk Meh uf: buendnertalk.ch Wechslisch gad s Handyabo? Do gohts zum Sunrise Agebot

  • #13
    July 16 · 31 min

    #13 Nia meh Mayo – Nathi Hotz

    Dr Nathi isch nit lang vor siner Hochzit und verzellt, was für ihn scho vor dr Ehe muas klar sii, was ar Partnerin wichtig isch: Glauba, Ziel im Läba, Charakter, also meh als nur Schmetterling im Buuch. Bi dr Frog Nummer 28 goht’s um dr wichtigschti Tag im Jahr. Bi ihm ischs dr Hochzitstag und denn verzelltr wia er sini Nadine kennaglernt het. Dazwüscha bliibt’s aber au liacht, öppis luschtigs bi dr entweder oder Frog isch garantiert. Zum Schluss sin Wunsch an alli Zuahörer: meh mitanand statt gäganand und meh zualosa als reda. Hesch a Idee für mini 80er-Frogalischta, kennsch a spannenda Gascht oder wotsch selber mal ufnäh? Schriib miar uf Instagram: @buendnertalk Meh uf: buendnertalk.ch Wechslisch gad s Handyabo? Do gohts zum Sunrise Agebot

  • #12
    July 2 · 34 min

    #12 Wasi mim jüngera Ich gera gsait hätt – Annemarie

    D Annemarie isch hüt bi mir z Gast und mir raisend zäme durs sechs-, zwölf- und achtzän-jährige Ich. Vorher gits wieder d klassischi Entweder-oder-Frag, wo’s um Rivella gäged Focus Water goht, denn a Frag zu KI-Brainrot und Dataschutz. Danach entscheidet wieder a Zahl zwüscha eis und achtzg, was mir diskutiered: Modefehler as Chind, dr Bruaf ohni Recherche gwählt und dr Umzug id Schwiz, wo tüür worda isch. Zum Schluss goht’s no drum, wia wichtig as isch, dankbar für die chlina Sacha im Alltag z si. Ehrlich, spontan und mit Härz, wia immer bim Bündnertalk. Hesch a Idee für mini 80er-Frogalischta, kennsch a spannenda Gascht oder wotsch selber mal ufnäh? Schriib miar uf Instagram: @buendnertalk Meh uf: buendnertalk.ch Wechslisch gad s Handyabo? Do gohts zum Sunrise Agebot

  • #11
    June 18 · 35 min

    #11 Sich nit finda müassa – Laura

    I dera Episoda redand d Laura und i über Ehrlichkait wo wehtut und doch befrait, über d Frag wias sich ahfüahlt sich selber nit “finda” z müassa, und über s Vertraua is aigata Buuchgfüahl, au wenns rational kai Sinn macht. Plus: Was würsch du dir wünscha, ima Briaf vo dim zukünftiga Ich z läsa? Hesch a Idee für mini 80er-Frogalischta, kennsch a spannenda Gascht oder wotsch selber mal ufnäh? Schriib miar uf Instagram: @buendnertalk Meh uf: buendnertalk.ch Wechslisch gad s Handyabo? Do gohts zum Sunrise Agebot

  • #10
    June 4 · 27 min

    #10 Vergäh macht frei – Serena Schlüter

    D Serena verzellt, wia si ihrem Vater vergäh het, ama Ma, wo d’Familie verloh het, wo si sächs Jahr alt gsi isch. Was am Afang unmöglich usgseh het, isch mit dr Zit zu ama echta Befreiigsgschlag worda. Mir redan über Vertraua, wo zerbrocha isch, emotionali Abhängigkait, Mobbing-Erfahriga und d’Frag: Wie noch lömmar Menscha an üs ana wemmr scho oft enttüscht worda sind? Ehrlich, tief und voller Momänt, wo ma merkt, do redt öpper würklich usm Läba. Hesch a Idee für mini 80er-Frogalischta, kennsch a spannenda Gascht oder wotsch selber mal ufnäh? Schriib miar uf Instagram: @buendnertalk Meh uf: buendnertalk.ch Wechslisch gad s Handyabo? Do gohts zum Sunrise Agebot

  • #9
    May 21 · 31 min

    #9 Flat White und Glücklichkeit – Thaddäus Krause

    I dera Episoda wird’s kulinarisch und tüüfgründig! Noch dr wichtigsta Zmorga-Frog (Nutella mit oder ohni Butter?) und dr Entscheidig zwüscha Flaischverzicht und am gliabta Flat White, tauchand dr Ramon und dr Thaddl ab in verruckti Spontan-Abentüür uf London und Kroatiä, d „Füüf Sprocha vo dr Liabi“ und wiso ächti Fründschafta im reala Läba so viel wertvoller sind as 1000 oberflächlighi Kontäkt uf Social Media. Schnapp dr din Liablingskaffi und gnüss diä patschifigi Folg! Hesch a Idee für mini 80er-Frogalischta, kennsch a spannenda Gascht oder wotsch selber mal ufnäh? Schriib miar uf Instagram: @buendnertalk Meh uf: buendnertalk.ch Wechslisch gad s Handyabo? Do gohts zum Sunrise Agebot

  • #8
    May 7 · 37 min

    #8 Was investiersch du in a Fründschaft? – Saphira

    In dera Episode isch d’Saphira us Chur z Gast, wo mit 20 Johr bereits a halbs Johr in Kanada verbrocht hät. Sie verzellt üs vo dr kanadischa Witi, vo unbeschwärta Momenta in ara Lodge am See und worum d’Offeheit vo da Kanadier ihres Bild vom Mitanand komplett uf dr Kopf gstellt hät. Miar redand drüber, worum miar Schwizer üs amol a Schiiba vo dera Hilfsbereitschaft abschniida könntend, egal ob’s um a spontans „Grüazi“ uf dr Gass goht oder drum, ara fremda Person am Bahnhof Chur d’Iikaufstascha z’traga oder amol spontan s’Joghurt z’zahla. Aber miar bliband nit nur an dr Oberflächi, sondern gönnd döt hi, wo’s persönlich wird, zur Frog, wia viel ma eigentlich in a Fründschaft investiera muass und worum Ehrlichkeit am Endi alles entscheidet. Miar diskutierand drüber, wia mer erkennt, ob a Bezüchig eim Energie git oder raubt, worum mer sich au amol dörf usanandläba und wia wichtig ächti Präsenz hützutags isch. D Saphira verzellt üs au, worum sie Team Velo isch, au wenn ihres pinka Stadtvelo eigentlich ready für dr Schrotthufa wär. Freu di uf a Gspröch über d’Kunscht vum Hilf-Anneh, dr Mut zu echta Gspröch und dr zentrala Frog: Was investiersch du in a Fründschaft? Hesch a Idee für mini 80er-Frogalischta, kennsch a spannenda Gascht oder wotsch selber mal ufnäh? Schriib miar uf Instagram: @buendnertalk Meh uf: buendnertalk.ch Wechslisch gad s Handyabo? Do gohts zum Sunrise Agebot

  • #7
    April 23 · 38 min

    #7 Wortwörtlich da Boda unter da Füass verlora – Elena

    Hüt wird’s im Bündnertalk so persönlich und ächt wia no nia. I dr neusta Episoda sitzand d’Elena und i im Studio. Miar redand über as Erläbnis vor weniga Täg, wo üses Läba fast für immer veränderet hätt. Uf ara Wanderig zwüscha am Fürhörnli und am Montalin bini uf 2000 Meter Höhchi usgrutscht und 150 Meter an 45-Grad steila Hang abagstürzt, han mi mehrmols überschlaga und bi schlussändlich im steila Hang ligga bliba. D’Elena hät dr ganzi Absturz müassa mitaluaga und hät im erschta Momänt gmaint, das i sterba. I dera Episoda teiland miar baidi ganz offa üsi Sichtwiisa vo dem Tag. A Episoda über d’Zerbrechlichkeit vum Läba, dr Wärt vu Schutzengel und d’Fähigkeit, au nachama Schock wieder s’Positiva z’gseh. Patschifig, nit perfekt, aber ztiefst ächt. Hesch a Idee für mini 80er-Frogalischta, kennsch a spannenda Gascht oder wotsch selber mal ufnäh? Schriib miar uf Instagram: @buendnertalk Meh uf: buendnertalk.ch Wechslisch gad s Handyabo? Do gohts zum Sunrise Agebot

  • #6
    April 9 · 32 min

    #6 Perspektiva im Alltag – Ismael

    I dera Folg vom Bündnertalk hät dr Ramon dr Ismael us Felsberg zu Gast. Miar redand drüber, wia dr Ismael noch sim erschta Surftrip in Spania d’Abwechslig gschätzt hät, aber trotzdem gera in Graubünda dahai isch. As kunnt as ehrlichs Gspröch uf über Fehler im Job – wia wenn dr Rasamäher uf Beton trifft – und warum s so wichtig isch, Kollega z’ha, wo eim sägend, dass alles guat kunnt. Dr Ramon verzellt offa vo sim Studiaabbruch und wia eim dr Rat vo Kollega dr Wäg zeiga kann. Zum Schluss erklärt dr Ismael, warum Gfüahl zwar guati Begleiter, aber schlechti Leiter sind und warum er jeda Morga mit 100% Isatz startet. Ganz ächt und patschifig. Hesch a Idee für mini 80er-Frogalischta, kennsch a spannenda Gascht oder wotsch selber mal ufnäh? Schriib miar uf Instagram: @buendnertalk Meh uf: buendnertalk.ch Wechslisch gad s Handyabo? Do gohts zum Sunrise Agebot

  • #5
    March 26 · 21 min

    #5 Bewundert ma nur was ma selber nit chan? – Annemarie

    I dera Folg vom Bündnertalk pickt d’Anne folgendi Frog: Welli Eigaschafta bewunderisch du an anerna Lüüt? Us dära Frog ergit sich a richtig ehrlichs Gspröch über üsi eigna Schwächa und d’Stärka vo üsam Umfäld. Miar redand drüber, wiso üs Sprachtalent so fasziniarand, was es bruucht, zum Lüüt würkli zemma z’bringa, und wia vill inneri Ruah as bruucht, zum unter Druck d’Nerva nit z’verlüüra. Ä Gspröch über Identität, persönlichi Wärt und d’Frog, wieso d’Entscheidig für Latinisch z lerna in dr Schual villicht doch nit dia best gsi isch. Ganz ächt und patschifig. Hesch a Idee für mini 80er-Frogalischta, kennsch a spannenda Gascht oder wotsch selber mal ufnäh? Schriib miar uf Instagram: @buendnertalk Meh uf: buendnertalk.ch Wechslisch gad s Handyabo? Do gohts zum Sunrise Agebot

  • #4
    March 12 · 23 min

    #4 Über Gfühl reda isch wia Isbada, usafordernd aber tuat guat – Serena Schlüter

    Hüt wird’s ehrlich. Mir startend wia gwohnt mit as paar klassischa Entweder-Oder-Froga zum Warmwerda: Dessert oder Kraftsport? Früahufsteher oder Nachtmensch? Denn tauchand miar aber tüüfer i: Miar redand über dä Schmärz, wo ma nit gseht, aber am maischta gschpührt. Ischs schwirig? Jo. Ischs wichtig? Definitiv. Hesch a Idee für mini 80er-Frogalischta, kennsch a spannenda Gascht oder wotsch selber mal ufnäh? Schriib miar uf Instagram: @buendnertalk Meh uf: buendnertalk.ch Wechslisch gad s Handyabo? Do gohts zum Sunrise Agebot

  • #3
    February 26 · 33 min

    #3 Miar wönd doch alli nur Glücklich sii – Thaddäus Krause

    “Miar wönd doch alli nur Glücklich sii” das isch öppis wo da Thaddl erkennt hät, doch was wünscht er sich und was für Wünsch machand sicher nid Glücklich. Chama vo Musig süchtig werda oder nid? Um dia und wiiteri Froga gohts i dera Episoda. Hesch a Idee für mini 80er-Frogalischta, kennsch a spannenda Gascht oder wotsch selber mal ufnäh? Schriib miar uf Instagram: @buendnertalk Meh uf: buendnertalk.ch Wechslisch gad s Handyabo? Do gohts zum Sunrise Agebot

  • #2
    February 12 · 41 min

    #2 Wenns nid eifach isch – Valerie Mirindi

    “As brucht da Winter zum da Summer z gnüssa” – das isch a Grundhaltig wo da Valerie Mirindi het und au usläbt. I dera Episoda redamr über sin Wäg als Standup Comedian, über Gäld, schwirigi Ziita und was einem dabi Hilft zum dura bissa. Schrib doch ind Kommentär was diar in schwiriga Ziita gholfa het. Hesch a Idee für mini 80er-Frogalischta, kennsch a spannenda Gascht oder wotsch selber mal ufnäh? Schriib miar uf Instagram: @buendnertalk Meh uf: buendnertalk.ch Wechslisch gad s Handyabo? Do gohts zum Sunrise Agebot

  • #1
    January 29 · 19 min

    #1 Veloschlüch wechsla und anderi green Flags – Annemarie

    Alli Fraua findends guat. D Annemarie au. An Ma muas an Veloschluch wechsla chönna. Das isch as super Indiz für handwärklichi Begabig. Über sötigi und anderi wichtigi Kriteria diskuatiaramer i dera Episoda. Quizfrog and Tiarliabhaber: Was für as Tiarli pfiift im Intro und Outro? Hesch a Idee für mini 80er-Frogalischta, kennsch a spannenda Gascht oder wotsch selber mal ufnäh? Schriib miar uf Instagram: @buendnertalk Meh uf: buendnertalk.ch Wechslisch gad s Handyabo? Do gohts zum Sunrise Agebot

  • January 26 · 39 sec

    Trailer

    Bündnertalk – Ehrlich, spontan und mit Härz Neui EP jeda zweiti Donnstig, 5i am Morga Ächti Gspröch ohni Skript. I, dr Ramon Heeb, träffa spannendi Menscha us Graubünda und vo wiiter wäg. Miar reden über ds Läba, Freud, Arbet, verruckti Idea und alles, was grad so passiert, genau so, wia’s im ächta Läba isch: nit perfekt, aber ächt. Immer patschifig und garantiert nia langwilig! Jedi Episoda startet mit ama kliina Ritual: Zerscht gits an Entweder-oder-Frog an da Gast, dänn törf dr Gast a Frog zrugg an mi stella. Zum Schluss wählt dr Gast a Zahl zwischa 1 und 80 – und mir tauchand spontan in a Frog us minera Lischta i, ganz ohni Vorwarnig. Los dri und kumm mit uf a Reis dur ehrlichi Gspröch, spontani Moment und guati Vibes. Hesch a Idee für mini 80er-Frogalischta, kennsch a spannenda Gascht oder wotsch selber mal ufnäh? Schriib miar uf Instagram: @buendnertalk Meh uf: buendnertalk.ch Wechslisch gad s Handyabo? Do gohts zum Sunrise Agebot

Showing 1–18 of 18 episodes